Се одржа првата работилница за подготовка на новиот Регионален план за управување со отпад за Пелагонискиот и Југозападниот регион

По завршувањето на Регионалниот форум за управување со отпад во Скопје, на 29 и 20 април 2026г., се одржа и работниот дел од настанот посветен на подготовката на новиот Регионален план за управување со отпад (РПУО) за Пелагонискиот и Југозападниот регион за периодот 2027–2032.

На работилницата учествуваа претставниците на општините и јавните комунални претпријатија, членови на работните групи за управување со отпад, а во фокус беа дискусиите врзани со резултатите од досегашната имплементација на РПУО, предизвиците со кои се соочуваат општините и приоритетите за следниот шестгодишен период. Посебен акцент беше ставен на потребата новиот план да биде практичен, остварлив и усогласен со реалните потреби и капацитети на општините.

Во текот на првиот ден од работилницата беше претставена и методологијата за подготовка на новиот РПУО, која предвидува активна вклученост на општините, транспарентен процес и планирање базирано на податоци. Дополнително, беше презентирана и веб-платформата „Регион без отпад“, која ќе служи како централизирана алатка за пристап до информации, следење на состојбите и поддршка на процесот на донесување одлуки.

Вториот работен ден од работилницата беше посветен на дефинирање на визијата и приоритетите на новиот регионален план, преку заедничка работа и координација помеѓу сите засегнати страни. Целта е да се постави основа за модерен, функционален и одржлив регионален систем за управување со отпад, кој ќе обезбеди поквалитетни услуги и почиста животна средина за граѓаните.

Процесот се реализира во рамки на проектот „Одржливо управување со отпад на локално ниво“, финансиран од Шведска, имплементиран од SALAR International, и има за цел да обезбеди координиран, инклузивен и практичен пристап во воспоставувањето на функционален и одржлив регионален систем за управување со отпад.